வேர்கள் - மொழிபெயர்த்தோன் உரை

அமெரிக்கக் கறுப்பர் மால்கம் Xன் வாழ்க்கை வரலாற்றை தமிழ் கூறும் நல்லுலகிற்கு முதன் முதலில் தந்தவர்கள் விடியல் வெள்ளி மாத இதழின் ஆசிரியர் மு. குலாம் முஹம்மத் அவர்கள்.

அமெரிக்காவில் வாழும் கறுப்பர்கள் ஆப்ரிக்காவிலிருந்து கடத்தப்பட்டவர்கள் என்ற உண்மையையும், ஆப்ரிக்காவில் அவர்கள் முஸ்லிம்களாக இருந்தார்கள் என்ற ஆச்சரியமான உண்மையையும் நான் “மால்கம் X” நூல் மூலமாக அறிந்தேன்.

அத்தோடு அலெக்ஸ் ஹேலி எழுதிய “ரூட்ஸ்” என்ற புதினத்தைப் பற்றியும் முதன்முதலில் அந்நூல் மூலம் அறிந்தேன். அப்பொழுதே “ரூட்ஸ்” நாவலைப் படிக்க வேண்டும் என்ற ஆர்வம் எழுந்தது.

பிற்றை நாட்களில் அந்த நூலைப் படிக்கும்பொழுது நெஞ்சமெல்லாம் கனத்தது. ஆப்ரிக்கக் கறுப்பர்கள் அமெரிக்கர்களால் பட்ட அவலங்கள் ஏட்டில் வடிக்க முடியாதவை. அந்த நாவலைப் படிக்கும் யாரையும் அது உலுக்காமல் விட்டதில்லை.

இந்த நாவலை தமிழில் மொழிபெயர்த்திடும் எனது ஆசையை அண்ணன் குலாம் முஹம்மத் அவர்களிடம் தெரிவித்தபொழுது, மகிழ்ச்சியுடன் இசைவு தந்தார்கள். அத்தோடு ஆலோசனைகள் பல தந்து, ஆர்வமும் ஊட்டினார்கள். அவர்களுக்கு என் மனமார்ந்த நன்றிகள் பல.

எனினும் உடனடியாக இந்த வேலையைத் தொடர முடியவில்லை. இப்பொழுதுதான் இந்தப் பணி நிறைவடைந்திருக்கிறது. எல்லாப் புகழும் அல்லாஹ்வுக்கே!

ஆங்கிலத்தில் 729 பக்கங்களைக் கொண்டது இந்நாவல். 120 அத்தியாயங்களைக் கொண்டது. அதனை அப்படியே மொழிபெயர்த்தால் தமிழில் 1000 பக்கங்களுக்கு மேல் வரும். அதனால் முடிந்தவரை சுருக்கியிருக்கிறேன் - மூலத்தின் வேகம் குறையாமல்.

இந்நூல் வெளிவர உதவிய அனைவருக்கும் எனது மனமார்ந்த நன்றிகள்.

M.S. அப்துல் ஹமீது


நூல்                       : வேர்கள்
மூலநூல்             : Roots : The Saga of an American Family
மூல ஆசிரியர்  : Alex Haley
தமிழில்                : எம்.எஸ். அப்துல் ஹமீது
விலை                  : ரூ. 100
வெளியீடு/கிடைக்குமிடம் : இலக்கியச்சோலை
                                                        25, பேரக்ஸ் சாலை
                                                        பெரியமேடு, சென்னை - 600 003.
தொலைபேசி                            : +91 44 25610969
தொலைநகல்                           : +91 44 25610872
மின்னஞ்சல்                             : ilakkiyacholai@gmail.com, vidialvelli@gmail.com