நமது தொலைக்காட்சிச் சானல்களில் வரும் நிகழ்ச்சிகளில் பெரும்பாலானவை முற்கூட்டியே தயாரிக்கப்பட்டவை, முன்னரே திட்டமிட்டு உருவாக்கப்பட்டவை. நேரடி கலந்துரையாடல் நிகழ்ச்சிகள் கூட எல்லாம் நாடகமயம்தான். அவர்கள் மக்களின் பிரதிநிதிகளை அழைப்பதுபோலிருக்கும். ஆனால் அவர்கள் விரும்பும் மக்களைத்தான் அழைப்பார்கள். அவர்கள் விரும்பும் கேள்விகளை மட்டும்தான் கேட்பார்கள். அவர்கள் விரும்பும் பதில்கள்தான் வரும். அப்படியே மாற்றமான பதில்கள் வந்தால் கத்திரி விளையாடிவிடும்.
இப்பொழுது அந்த நிலை கொஞ்சம் மாறி வருகிறது. 2007ம் ஆண்டு இறுதியில் கரன் தாப்பர் சிஎன்என் ஐபிஎன் தொலைக்காட்சியில் நரேந்திரமோடியுடன் நடத்திய நேர்காணல் இதற்கு சிறந்த உதாரணம். நேர்காணல் துவங்கிய ஒரு சில நிமிடங்களிலேயே குஜராத் இனப்படுகொலை சம்பந்தப்பட்டகேள்விகளுக்கு பதில் சொல்ல முடியாமல் திக்கித் திணறிய மோடி, வியர்த்து விறுவிறுத்து, தண்ணீரை மடக்கென்று குடித்து பேட்டியை நிறுத்தி விடுவார்.
இப்படி ஆரம்பத்தில் அதிகமாக நாடகமயமாக இருந்த இந்த நேர்காணல் நிகழ்ச்சிகள் இப்பொழுது கொஞ்சம் யதார்த்தத்திற்கு வந்துள்ளது. இதற்கு மக்களின் விழிப்புணர்வும் ஒரு காரணம்.
முன்பைப் போலல்லாமல் இப்பொழுது இந்த மாதிரி நேர்காணல் நிகழ்ச்சிகளில் பொதுமக்கள் கலந்துகொள்ளும் வாய்ப்பு அதிகரித்துள்ளது. இந்த வாய்ப்பை நாமும் பயன்படுத்திக்கொள்ளவேண்டும். தொலைக்காட்சி நிகழ்ச்சித் தயாரிப்பாளர்களுடன் தொடர்புகளை வலுப்படுத்திக்கொள்ளவேண்டும். நேர்காணல், சமீபத்தில் மிகவும் பிரபலமாகியுள்ள ரியாலிட்டிஷோக்கள் ஆகியவற்றில் கலந்துகொள்ளும் வாய்ப்புகள் கிடைத்தால் தவறாது நாம் கலந்துகொள்ளவேண்டும். அத்தோடு நம் கருத்துகளைதைரியமாக, ஆணித்தரமாக எடுத்து வைக்கவேண்டும்.
பல்லாயிரக்கணக்கான மக்கள் பார்க்கும் நிகழ்ச்சிகள் என்பதால் நமது பேச்சுதெளிவாக இருக்கவேண்டும். அதே சமயம் இஸ்லாம் போதித்துள்ள சங்கைகளைக் கடைப்பிடித்து, கண்ணியமான வார்த்தைகளைக் கையாளவேண்டும். ஒரு முஸ்லிம் இப்படித்தான் இருப்பான் என்பதை அங்கே பறை சாற்றவேண்டும். இஸ்லாம் இயம்பியபடி நல்ல ஆடைகளை அணிந்து, அல்லாஹ் விரும்பியபடி அலங்கரித்துக்கொண்டு செல்லவேண்டும். நீண்ட நீண்ட வார்த்தைகளைச் சொல்லி காண்போரைக் கடுப்பேற்றாமல் நறுக்கென்று சுருக்கமாக, இனிமையாகப் பேசவேண்டும்.
No comments:
Post a Comment