மின்னணு ஊடகங்கள்
தொலைக்காட்சியின் அசுர வளர்ச்சியும், பயன்பாடும், அதன் மீது மக்களுக்கு ஏற்பட்டுள்ள அபரிமிதமான ஆர்வமும், மிக எளிதாகப் போய்ச்சேரும் அதன் தன்மையும் மின்னணு ஊடகங்களில் நமது தலையீட்டின் அவசியத்தை வலியுறுத்தி நிற்கின்றன.
ஒரு காலத்தில் தொலைக்காட்சி என்றாலே தூர்தர்ஷன்தான். புதன்கிழமைகளில் ஒளிபரப்பப்படும் ‘’ஒலியும் ஒளியும்’’ மிகவும் பிரபலம். தவமாய்த் தவமிருந்து அதனைக் கண்டு களித்தோர் பலர். ‘’ஒலியும் ஒளியும்’’ ஒளிபரப்பப்படும் நேரத்தில் மின்வெட்டு ஏற்பட்டால் அந்த வெட்டைச்செய்தவருக்கு மட்டுமல்ல, அவரது பல தலைமுறைகளுக்கும் திட்டுகள் விழும்.
இப்படிப்பட்ட தூர்தர்ஷன் இன்று அத்தனை மவுசும் இழந்து அதிகம் பார்க்கப்படாத தொலைக்காட்சியாக மாறியுள்ளது. இதற்கு தனியார் தொலைக்காட்சிச் சானல்களின் வரவும், அவற்றின் அசுர வளர்ச்சியும்தான் காரணம்.
காட்சி ஊடகம் ஏற்படுத்தும் தாக்கம் அபரிமிதமானது. ஹிந்துத்துவாவின் வளர்ச்சிக்கும், வண்ணத் தொலைக்காட்சிகளின் வரவுக்கும் மிகுந்த சம்பந்தம் உண்டு. வண்ணத்தொலைக்காட்சிகள் வந்த பின்தான் ஹிந்துத்துவாவின் வளர்ச்சி அதிகமானது. நடுத்தர வர்க்கத்தினரும்,தொழில்நுட்ப வல்லுனர்களும் ஹிந்துத்துவாவில் இணைய இதுவே காரணமானது.
காட்சி ஊடகம் துவக்கம் முதலே கலாச்சார அளவிலும், மதத்தின் அடிப்படையிலும் சிறுபான்மையாக இருக்கும் மக்களை எதிரிகளாகவே காட்ட முனைந்து வந்துள்ளது.
நிதர்சனமான நிழற்படங்களின், விதவிதமான சப்தங்களின், நவீன இசைகளின், காட்சிகளின் உலகில் நாம் வாழ்ந்து வருகின்றோம். எனவே இதனை நாம் எதிர்கொண்டே ஆகவேண்டும்.
அச்சு ஊடகத்தைப் போலவே மின்னணு ஊடகமும் சந்தையின் அழுத்தங்களுக்கும், வெளியிலிருந்து வரும் அழுத்தங்களுக்கும் பணிந்துபோகின்ற சூழ்நிலையே உருவாகியுள்ளது. எனவே உண்மைக்குப் புறம்பான செய்திகள் வெளியாகும்பொழுது அதன் பின்னணியிலுள்ள மக்களை நாம் சந்திக்கவேண்டும். அந்த நிகழ்ச்சித் தயாரிப்பாளரிலிருந்து தலைமை நிரவாகி வரை சந்திக்கவேண்டும்.
அன்புக்கும், பணிவுக்கும், கனிவான நடைமுறைக்கும் என்றுமே மதிப்பு உண்டு. வெறும் கோபத்தைக் கொப்பளிக்கும் செயல்பாடுகளோ, அதிகப்படியான எதிர்நடவடிக்கைகளோ ஒரு பலனையும் தராது.
நம்மால் நேரடியாகச் சென்று பார்க்க முடியாவிட்டால் கடிதம் மூலமாகவோ, தொலைபேசியிலோ, மின்னஞ்சல் மூலமாகவோ நமது கருத்துகளைத்தெரிவிக்கலாம்.
நல்ல சாங்கியமான சொற்களில் தவறைச் சுட்டிக்காட்டவேண்டும். நமது கருத்துகளுக்கு ஆதரவான ஆதாரங்களை எடுத்துக்காட்டவேண்டும்.
No comments:
Post a Comment